Rreziqet e përdorimit të alkoolit për të lehtësuar ankthin

Shumë të rritur e përdorin alkoolin me përgjegjësi. Për disa njerëz, kjo mund të nënkuptojë që herë pas here të kenë një mundësi për t’u çlodhur pas një dite të gjatë ose organizojnë festa me pije në një mbledhje me shoqërinë. Në këto situata, pirja e alkoolit konsiderohet e pranueshme nga shoqëria, madje edhe e zakonshme.

Megjithatë, edhe përdorimi i kufizuar i alkoolit mund të paraqesë probleme për disa njerëz. Në disa raste, njerëzit që kanë kushte të caktuara të shëndetit mendor, të tilla si ankthi ose çrregullimi i panikut, mund të zhvillojnë një marrëdhënie jo të shëndetshme me alkoolin.

Ndonjëherë, njerëzit i drejtohen alkoolit ose substancave të tjera për t’i ndihmuar ata të përballen me simptomat e sëmundjes mendore.

Një përmbledhje e studimeve të publikuara në 2012 zbuloi se çrregullimet e ankthit dhe çrregullimet e përdorimit të alkoolit shpesh ndodhin së bashku. Ka disa shpjegime të propozuara për lidhjen, duke përfshirë gjenetikën, mjedisin e një personi dhe mekanizmat e trurit që lidhen me simptomat e varësisë dhe ankthit. Duke pasur parasysh lidhjen e mundshme, nuk është për t’u habitur që hulumtimet shtesë kanë treguar se trajtimi i një gjendjeje kërkon adresimin e duhur dhe lidhjen me të tjerat.

Efektet e alkoolit

Alkooli depreson sistemin nervor qendror. Kur dikush pi për herë të parë alkool, ai shpesh ka një efekt qetësues. Mund të prodhojë një ndjenjë euforie dhe të ulë frenimin e një personi. Këto efekte mund ta bëjnë të duket sikur pirja e alkoolit po i ofron personit lehtësim nga ankthi i tij.

Megjithatë, efektet afatgjata të alkoolit mund të shkaktojnë ankth ose të përkeqësojnë simptomat e një çrregullimi ankthi. Për më tepër, përdorimi kronik i alkoolit mund të çojë në tolerancë ose varësi, si dhe të shkaktojë dëme fizike në trup (duke përfshirë trurin, mëlçinë dhe zemrën).

Përdorimi i alkoolit dhe çrregullimet e ankthit

Njerëzit me çrregullime ankthi, duke përfshirë çrregullimin e panikut dhe agorafobinë, ndonjëherë përdorin alkool për të përballuar ndjenjat e frikës dhe ankthit. Një teori tregon pse ndodh kjo, ajo quhet “hipoteza e uljes së tensionit”. Kjo teori sugjeron që alkooli përdoret si një metodë vetë-mjekimi për të reduktuar stresin dhe ankthin.

Studiues të tjerë kanë propozuar një lidhje gjenetike që ndikon në nivelin e ankthit të një personi, si dhe në konsumin e tyre të alkoolit. Këto teori biologjike sugjerojnë se mund të ketë një mekanizëm të trurit që është përgjegjës si për simptomat e ankthit ashtu edhe për sjelljet e alkoolit.

Në disa raste, një person që pi alkool për të lehtësuar ndjenjat e ankthit mund të përfundojë duke pirë më shumë sepse ata presin që alkooli të sigurojë një sasi të caktuar lehtësimi nga simptomat e tyre të ankthit dhe kjo është e gabuar.

Një tjetër teori e propozuar i referohet një komponenti të pritjes tek njerëzit me ankth që përdorin alkool. Në këtë situatë, një person pret që të çlirohet nga simptomat e tij të ankthit kur konsumon alkool për shkak të efektit të tij në sistemin nervor qendror.

Sjellja e alkoolit të një personi lidhet me nivelin e tyre të ankthit dhe sa lehtësim ata presin që alkooli t’i japë. Në këtë skenar, sa më shumë ankth të përjetojë një person, aq më shumë priren të pinë në një përpjekje për të lehtësuar ankthin e tyre.

Çrregullimet e përdorimit të alkoolit dhe çrregullimet e ankthit

Një person me një çrregullim ankthi ka tre herë më shumë gjasa të zhvillojë një çrregullim të përdorimit të alkoolit në një moment të jetës së tij në krahasim me dikë që nuk është diagnostikuar kurrë me ankth.

Studimet kanë treguar se çrregullimet e përdorimit të alkoolit janë më të përhapura tek njerëzit që kanë kushte specifike të shëndetit mendor, duke përfshirë agorafobinë, çrregullimin e ankthit të përgjithësuar, çrregullimin e ankthit social dhe çrregullimin e panikut.

Efektet anësore të keqpërdorimit të alkoolit

Edhe nëse dikush fillon të pijë alkool si një mënyrë për të përballuar ankthin, ai shpejt mund të ketë efektin e kundërt. Për një njeri, pirja e alkoolit më shpesh ose konsumimi i sasive më të mëdha mund të shkaktojë hangover.

Simptomat e një hangover-i, janë të tilla si nauzea dhe të vjella, marramendje, dehidrim dhe sheqer i ulët në gjak, mund ta bëjnë të vështirë funksionimin. Nëse dikush është i sëmurë për shkak të një hangover, ai mund të mos jetë në gjendje të kryejë përgjegjësitë e tij në shtëpi, në familje si detyrimet për prindërit, për fëmijët, bashkëshortin apo dhe bashkëshorten, nuk përmbushin dot detyrimet në shkollë ose punë – gjë që, nga ana tjetër, mund të ushqejë ankthin e tyre.

Prandaj lehtësimi nuk vjen duke ushqyer të keqen me të keqen ose të humbasësh mendjen, por duke bërë durim, duke u larguar nga kjo e keqje, duke kuptuar problemin që ke, duke komunikuar me një person në shtëpi ose një mik shumë të afërt që e beson, duke shkuar te psikologu ose psikoterapisti për të kërkuar ndihmë se si të përballosh problemet dhe të reagosh në raste të caktuara. Ti nuk ke pse e fajëson veten se je me karakter të dobët. Ti do ta kalosh këtë situatë dhe ju mund të luteni në besimin tuaj, të kërkoni ndihmë te udhëheqësi shpirtëror dhe tregoni problemin tuaj dhe ai do t’ju këshillojë. Dije se sipas të gjitha besimeve fetare thuhet se “Krijuesi yt është i mëshirshëm dhe e pranon pendimin” . Kjo situatë e jotja është një sprovë  dhe drejtoju atij pa u përfshirë në doktrina të thella dhe ndihmoje kështu veten tënde dhe afroju familjes, të afërmëve, shoqërisë që kanë nevojë për ty. Kërko ndihmë dhe këshillim psikologjik te i afërmi yt, shoku, miku, familjari por pa e shqetësuar atë dhe tregoji gjendjen tënde e se ti do të dalësh nga balta ku ke rënë dhe ke fuqinë dhe dëshirën e madhe. Ndihma më e madhe siç e theksuam do të jetë psikoterapisti jot, një psikolog, një mjek psikiatër, një këshillues shëndeti, familja dhe ti vet. Vetëm bëj një pjesë të gjësë dhe universi do të ndihmojë ty për pjesën tjetër.  Mos e  lejo veten të rëndohesh nga e shkuara, nga njerëzit dhe nga mendimet e të tjerëve.

Keqpërdorimi i rëndë ose i rregullt i alkoolit gjithashtu shpesh çon në tërheqje. Simptomat e tërheqjes së alkoolit dhe çrregullimeve të ankthit mund të jenë të ngjashme. Simptomat e tërheqjes së alkoolit mund të përfshijnë:

• Agjitacion
• Ankth
• Rritjen e presionit të gjakut dhe rrahjeve të zemrës
• Rritjen e temperaturës së trupit
• Nauze
• Sulmet e panikut
• Të vjella

Trajtimi për përdorimin e alkoolit dhe çrregullimet e ankthit

Nëse jeni duke përdorur alkoolin si një masë vetë-mjekuese, mund të mendoni se ai “funksionon” për t’ju ndihmuar të përballoni simptomat tuaja, por pa kuptuar kështu shkatërrimin që po ju sjell. Ai nuk është rruga e rikthimit dhe shërimit tuaj.  Ndërsa ju mund të mendoni se ai  funksionon në afat të shkurtër, ka më shumë gjasa t’ju shkaktojë probleme në afat të gjatë. Nëse keni një çrregullim ankthi, keqpërdorimi i alkoolit dhe tërheqja mund të përkeqësojnë simptomat tuaja. Po sigurisht që ka shpresë dhe nuk është alkoli. Ka trajtime dhe terapi të kombinuara shumë efektive dhe ju për një kohë të shkurtër do të dilni nga kjo situatë e përkohshme e jetës tuaj.

Nëse keni ankth dhe po përdorni alkool për të përballuar, është e rëndësishme që të kërkoni mbështetje nga mjeku juaj ose profesionisti i shëndetit mendor. Nuk është kurrë vonë (ose shumë herët) për të kërkuar ndihmë nëse po përpiqeni të përballeni me një gjendje të shëndetit mendor ose çrregullim të përdorimit të substancave.

Ka shumë trajtime efektive për çrregullimet e ankthit dhe përdorimit të alkoolit, duke përfshirë terapinë e vazhdueshme individuale, terapinë në grup, medikamentet e përshkruara ose një kombinim të këtyre metodave.

Ripunuar nga:

Mendje (e) Shëndoshë, mendjeshendoshe